काठमाडौं, २२ कात्तिक – गत वर्षको गाइजात्रामा सिताराम कट्टेल ‘धुर्मुस’ केपी शर्मा ओली बनेका थिए । धुर्मुसले गरेको आफ्नो नकल हेर्न एमाले अध्यक्ष ओली प्रज्ञा प्रतिष्ठान पनि पुगेका थिए । आइतबार फेरि धुर्मुसले ओलीका अगाडि प्रस्तुति दिए । प्रधानमन्त्रीका रुपमा कार्यक्रममा पुगेका ओलीलाई धुर्मुसले यसपालि मुस्कान पासा बनेर उडाए । नेपालीले सुरु गरेको साजिक सञ्जाल सुगनडटकमको शुभारम्भ गर्न पुगेका ओलीलाई नेवार समुदायको पात्र बनेका सितारामले ‘ज्वाईं’ सम्वोधन गरे । नेवार पोशाकमा सजिएका मुस्कान पासाले हातमा कोट झुन्ड्याएर आएपछि सुन्तलीले सोधिन्– ‘किन चाहिँ नलगाएर किन हातमा लिएको ?’
त्यसको जवाफमा ओलीतिर हेर्दै उनले भने, ‘ज्वार्इं प्रधानमन्त्री हुनु हुन्छ । ६ जना उपप्रधानमन्त्री बनाइसक्नु भयो । मलाई पनि उपप्रधानमन्त्री बन्नु पर्यो भनेर बोलाइहाल्नु हुन्छ कि भनेर यो कोट लिएर हिँडेको ।’ आफूलाई गरिएको व्यंग्य सुनेर ओली हाँसे । सुन्तलीले थपिन्, ‘ओली कलाकारलाई धेरै मन पराउनु हुन्छ । उहाँले गत वर्षको हाम्रो फिल्म ‘६ एकान ६’ हेर्नु भएको थियो । यसपटक पनि हाम्रो ‘वडा नम्बर ६’ हेर्नु भयो । दुवै फिल्म सुपरडुपर हिट भए । त्यही भएर ६ नम्बर ठीक लागेर ६ जना उपप्रधानमन्त्री राखेका होलान् ।’ ओली र सँगै रहेका उपप्रधान तथा परराष्ट्रमन्त्री कमल थापासँगै पूरै हल हाँसोले गुञ्जियो ।
No comments:
Post a Comment