|
|
भाद्र १८, २०७२- हिन्दु धर्मावलम्बीहरूले शनिबार मुलुकभर श्रीकृष्ण जन्माष्टमी पर्व मनाउँदैछन् । यस दिन श्रद्धालुहरू कृष्ण मन्दिरहरूमा गई श्रीकृष्णको पूजा आराधना, व्रत र भजनकीर्तन गर्छन् ।
ललितपुरमा भने यसपटक दरबार क्षेत्रस्थित प्रसिद्ध कृष्ण मन्दिरमा भगवान् श्रीकृष्णको मूर्ति दर्शन गर्न पाइने छैन । श्रद्धालुहरूले भगवान् श्रीकृष्णको पादुकामात्र दर्शन गरेर चित्त बुझाउनुपर्नेछ ।
भूकम्पका कारण मन्दिर जोखिमपूर्ण भएकाले भक्तजनलाई प्रवेश गर्न नदिई भगवान् श्रीकृष्णको चाँदीको पादुका मन्दिरसँगैको डबलीमा राखिने निर्णय भएको गुठी संस्थान ललितपुर शाखा कार्यालयका प्रमुख रुद्रनाथ अधिकारीले कान्तिपुरलाई बताए ।
जन्माष्टमीका अवसरमा राष्ट्रपति डा. रामवरण यादव कृष्ण मन्दिर गई श्रीकृष्णको दर्शन र प्रसाद ग्रहण गर्ने कार्यक्रम छ । भगवान् श्रीकृष्णको जन्म द्वापरयुगमा रोहणी नक्षत्रयुक्त भाद्रकृष्ण अष्टमीको मध्यरातमा मथुराको एक कारागारमा कंसकी बहिनी देवकीको कोखबाट भएको थियो । यस रातलाई मोहरात्रि भनिन्छ ।
|
|
Post a Comment